Исай Прокопьевич Никифоров - Саха сирин биллиилээх суруйааччыта, Саха АССР Культуратын үтүөлээх үлэһитэ, Хаҥалас улууһун (уруккута Орджоникидзевскай оройуон) Бочуоттаах гражданина, 1939 сыллаахтан ССРС суруйааччыларын Союһун чилиэнэ, Аҕа дойду Улуу сэриитин кыттыылааҕа, бойобуой офицер, Кыһыл Сулус уордьан, үгүс мэтээллэр кавалердара, журналист
Исай Прокопьевич Никифоров , ыам ыйын 1 күнүгэр 1915 сыллаахха Арҕаа Хаҥалас улууһун Малдьаҕар нэһилиэгэр Кытыл-Дьурааҕа төрөөбүтэ. Аҕата Никифоров Прокопий Иванович, бастакы коммунистартан биирдэстэрэ, ревкомовец этэ. Кинини Кыһыл этэрээтигэр сырыттаҕына 1922 сыллаахха Төхтүр таһыгар бандьыыттар ытан өлөрбүттэрэ. Ийэтэ Петрова Мария Николаевна түөрт оҕону төрөтөн баран эдэр сааһыгар өлбүтэ. Онон оҕолор бары араас ыалларга, онтон Исай бүтүн дэриэбинэ көрүүтүгэр хаалбыттара. Исай Никифоров оҕо, эдэр сааһа Кытыл- Дьураҕа ааспыта. Советскай былаас көмөтүнэн Тойбохойго (Сунтаар улууһа) интернакка олорон үөрэнэн киһи-хара буолбута. Бу туһунан "Ыстапаан", "Сүрэх кэпсиир" айымньыларыгар суруйбута.
Кини бастакы колхозтары тэрийсибитэ. 1934-1939 сс. профсоюзнай тэрилтэлэргэ үлэлээбитэ.
1939 сыллаахха «Степан» диэн сэһэнэ туспа кинигэнэн бэчээттэнэн тахсыбыта. Кэлин «Саллааттар», «Кырачаан булчуттар», «Олох иһин охсуһуу», «Түбүктээх саас», «Ким ордугуй?», «Икки сэһэн», «Саллаат өрүү саллаат» диэн кинигэлэри таһаартарбыта
1943 сылга диэри «Кыым» хаһыатын редакциятын отделын сэбиэдиссэйинэн үлэлээбитэ, онтон Советскай Армия кэккэтигэр ыҥырыллан барбыта. Исай Никифоров уоттаах сэрии суолларынан Берлиҥҥэ тиийбит, Кыайыы сырдык күнүн Бреслау куоракка көрсүбүт буойун буолар.
Дойдутутугар эргиллэн кэлэн баран, журналист араас эппиэттээх үлэтигэр сылдьыбыта "Советтар знамялара” хаһыакка 12,5 сыл редактордаабыта.
1949 сыллаахха Новосибирскайдааҕы уобаластааҕы партийнай оскуоланы үөрэнэн бүтэрбитэ. 1949-1953 сс. «Эдэр коммунист» хаһыатын эрэдээктэринэн, кэлин «Хотугу сулус» эппиэттээх сэкирэтээринэн үлэлээбитэ.
Кыым хаһыакка, суруйааччылар тэрилтэлэригэр үлэлии сылдьыбыта.
1976 сыл балаҕан ыйын 3 күнүгэр ыарахан ыарыыттан олохтон барбыта.
Суруйаачы суруктарын, хаартыскаларын, ситэ суруллубатах айымньыларын уола Исай Исаевич (авиация ветерана, билигин Алдаҥҥа олорор), сиэннэрэ, Раиса Исаевна уонна Геннадий Васильевич Гребневтэр олохтоох кыраайы үөрэтэр музейга туттарбыттара.
И. П. Никифоров аатын үйэтитэн суруйааччы олорбут, кини аатын сүгэр уулуссаҕа турар дьиэтигэр өйдөбүнньүк дуоска саайыллыбыта, Кытыл-Дьуратын уһун уулуссата кини аатын сүгэр.
Төрөөбүт түөлбэтин оскуолата Исай Никифоров аатын сүгэр.
